Pilkheitä

Näkyvyys nolla

24.10.2013 06:00 Linda Kauvosaari

Ensilumi ruukaa päässä yllättähmään – vaan ei tänä vuona. Renkhaat on tullu vaihatettua vuojen aikhaan sopiviksi jo rohki hyvissä ajoin, toisinko useasti.
Viime vuona kävi juuriki niin, että talvi ja ensimmäiset lumikinokset pääsit ylläthään.
Eihän se talvi tulekhaan ko joka vuosi.
No, eipä siinä voinu muutako itteänsä moittia ko matka Torniosta Nuotiorannale kesti tuplaten, jos ei melkein triplaten sen mitä ylleensä. Ko ei sitä mahottomia kesärenkhaila kehtaa hurjastela, ettei ole nokka eelä pusikossa. Tai vielä pahempaa.
Mutta eipä siinä mithään, ei mulla ittelä ylleensä olekhaan hoppu jos tienpäälä olhaan. Mikäs kiire se valhmiissa maailmassa on?
Mutta kyllä mieki yhtenä keskiviikkosena aamuna hoksasin, että tullee se hoppu hithaalekki ko jäisseen auttoon istahtaa eikä hanskoista puhettakhaan.
Ei muutako lämmitykset kaakkoon ja mahollisimman äkkiä pois tienpäältä.
Onneksi on menopelinä tuommonen aikaaki vanhempi vaaleansininen Corolla. Kiihtyyhän se, aina sinne kuutheenkymphiin saakka.
No jos rehellisiä olhaan niin alamäessä saatama päässä jo kaheksaakymppiä, jos on myötätuuli mukana. Pikku vioista viis, hyä autohan son. Se on vähän niinkö vanhat Nokia-puhelimet, ei hajoa yrittämälläkhään.
Sillä on käyty monet reissut, niin lähelä ko kaukana. Aina se vain on turvallisesti perile vieny, oli matkaa sitte enämpi tai vähempi.
Tännäänki se starttasi mutinoimatta, siis heti ko olin kaivanu sen kinoksen alta esile.
Vaikka kilometrit meiltä kotoa tänne Meän Tornionlaakson toimistolle voihaan laskea yhen käen sormila, tuntu tänä aamuna ettei siitäkhään matkasta selviä.
Lunta pyrytti eestä, takkaa, oikealta ja vasemmalta. Pari rekkaa tuli tuola lyhyelä välilä vasthaan. Pari kertaa pomppasi syän poies paikalthaan.
Eipä siinäkhään kauheasti hurjasteltu, ko ei nähny ko juuri konepellin verta etheenkäsin.
Sitte sai huokasta helpotuksesta ko sai auton keulan käännettyä kylänraitile.
Helpotus, ennää muutama hullu metri ja saapi taas jättää auton päiväksi lunta kerräähmään, eikä tartte huolehtia huonosta näkyvyyestä. Saatikka vastaan tulevista rekoista.
No eipä meitä ole sokerista tehty, ei se pikku lumisae kethään satuta jos muistaa olla varovainen ja laittaa auton ajoissa lämpeähmään, ettei tartte paikat kohmeessä lähteä hopula liikentheesseen.
Näin se taian mieki tehä ens aamuna.

Jaa uutinen:  

 
Viimeisimmät Pilkheet
Hae uutisista ja sivustolta
Ilmoitukset
Saajoturkis
 
Meän Tornionlaakso
Alkkulanraitti 48
95600 Ylitornio
Puh: 020 743 3210
ylitornio(@)tornionlaakso.net
Asiakaspalvelu:
Tilaukset
Osoitteenmuutos
Palaute
Uutiskirje
Yhteystiedot
Tavathan
Facebookissa:
Grafu Oy


Alkkulanraitti 48
95600 Ylitornio
Puh: 020 743 3210
ylitornio(@)tornionlaakso.net