Pilkheitä

Meill’ on hanki ja jää, meill’ on halla ja yö

15.11.2012 06:00 Linda Kauvosaari

Nytten, ko ulkona alkaa olla jo päiväsaikhaan niin hämärä, ettei ommaa nokkaansa eemäs näe, ja ko mittariki viisoo jo reilusti pakkasen puolela, niin saattaa yhtäkkiä iskeä se pahamaineinen laiskuus itte kullekki.
Niinkö siinä jugurttimainoksessaki sanothaan, että haluttais vain jäähä sohvale löhöään ja napostella jotaki hyvvää ja pistää nukkuhmaan.
Käpertyä sohvale viltin alle niinkö karhut talviunile konsahnaan.
Olishan se mukava.
Mutta mitäs sitte tehhään, ko tekis mieli vain jäähä sohvale makkaahmaan, ja pieninki arkinen askare tuntuu elämääki suuremmalta?
Ko haluttais herätä vasta sitte, ko aurinko taas suostuu tulehmaan esile ja ulkona on valosaa, sitte ko pahimmat pakkaskelit ovat ohitte, ja ulkona voipii oikeasti ollakki ilman, että näyttää samalta ko naapurin pihala könöttävä lumiukko.
Oishan se mukava ennemin nukkua lämpimässä peiton alla, ko pakottaa ittensä istuhmaan jäisseen authoon joka aamu ja ajahmaan töihin tai kouluun.
Muutekki tuntuu, ko päivät ovat näin lyhentyhneet ja pimeä tullee jo ennenkö ehtii huomatakhaan, että eihän sitä kerkeä alkaa millekhään. Päivä hujahtaa ohitte parissa tiimassa.
Mutta mitä siinä oikeasti voipii, ko tuntuu, ettei voimat jaksa kantaa tämän pimeän ja kylmän talven ajan ylitte?
Mie itte päätin, että ko tullee semmonen olo että ei jaksais alkaa millekhään, niin silloin ei ala!
Tekkee vähän aikaa jotaki miehluista hommaa ja sitte alkaa uuesti kattehleen niitä työhommia tai siivousta, mitä nyt milloinki.
Seki auttaa paljon, että vähän sekottaa pakkaa. Ihan pienekki asiat vaikuttaa ja voi piristää elämää niin mahottomasti.
Esimerkiksi jos solet tottunu sauhnoon lauantai-iltasin, niin lyöppä tällä kertaa vaikka sunnuntaiaamuna sauna tulile. Lähtee päivä aivan eri pirtsakasti käynthiin!
Tai jos solet nyt pari viikkoa kutonu sukkia, niin teheppä vaikka lapaset seuraavaksi!
Vaikka näin pakkaskeleillä voi tuntua inhottavalta ajatuski ulos lähtemisestä ja ko on niin liukastaki ja kaikkea. Mutta ko lähtee käyhmään vaikka semmosella vartin kävelyllä ulkona niin johan alkaa virtaa löytyhmään!
Se kyllä kummasti piristää, ko pakkanen purree poskipäitä ja jäinen tie narskuu kenkien alla.
Ja ennekö sie huomaatkhaan niin son jo taas kevät ja ne paksut kalsarit, villasukat ja lapaset saapii nakata kaapin pohjile!

Jaa uutinen:  

 
Viimeisimmät Pilkheet
Hae uutisista ja sivustolta
 
Meän Tornionlaakso
Alkkulanraitti 48
95600 Ylitornio
Puh: 020 743 3210
ylitornio(@)tornionlaakso.net
Asiakaspalvelu:
Tilaukset
Osoitteenmuutos
Palaute
Uutiskirje
Yhteystiedot
Tavathan
Facebookissa:
Grafu Oy


Alkkulanraitti 48
95600 Ylitornio
Puh: 020 743 3210
ylitornio(@)tornionlaakso.net